干露露憤「露」鳥 宣佈婚訊？

噚日干露露嘅媽咪(干媽媽)大騷佢驚天地、泣鬼神嘅5.8吋事業線，有冇美感就見仁見智，不過仲有後續0架！

今次就叫做冇咁驚嚇，不過一樣咁重口味，就係干露露豪放露股溝喇！嘩，佢哋真係不停咁露，果然冇改錯名喎...咁點解話佢係「憤露鳥」呢？因為干露露係擁住啲乳毛影半裸照，羽毛，咪「烏」囉。

干家三母女，除咗擅長谷胸露罅，另一絕招，係自製見報率，記憶猶新如三女母齊齊含／食蕉，猛讚好香好滑好好味；之前露露又話願意貼錢同陳冠希拍床戲、貪佢有經驗唔使慢慢教……近日又有內地報道話，干露露同內地製作人鄧建國籌備訂婚喇，更傳出兩人喺玫瑰同浴缸前拍攝一輯疑似結婚相添。

咪住先，之前又話露露俾人家小三，俾大婆當眾兜巴星仲毀容，咁究竟點0架!

拿，消息就係話呢，鄧建國自去年已經同干露露一齊，但一直唔肯承認兩人關係；點知依家一爆就爆出「要訂婚了」。有網民爆料話，上月底喺深圳見到鄧建國同干露露一齊，仲話兩人原定6號訂婚，依家又延期到12號。至於婚禮細節，據聞鄧建國宣稱將有500位娛樂圈名人明星出席，而訂婚儀式上，鄧建國仲會同干露露長吻15分鐘!嘩，到時唔會三母女輪流接力同新郎錫錫嘛？

內地傳媒好認真咁向鄧建國求證，鄧建國冇否認亦冇承認，鄧建國話近日係同干露露出入深圳：「我們是在籌備一些很浪漫的事，但現在不方便透露，但一定是好事。」干露露對訂婚事就話：「希望大家多關注我作品，我身體那麼好，你們也要多關注。」結...結...結婚同身體健唔健康，有關係0架？

咁究竟現年53歲嘅鄧建國係乜水呢？話係「廣東巨星影業公司」董事長，著名作品有《康熙微服私訪記》，人稱炒作王(同露露天生一對？)，同露露唯一嘅交集就係去年拍攝《公主出山》時，兩人被指「交往過密」，引來鄧建國90後嘅嬌妻劉陽不滿，憤而離開劇組，之後都冇乜聽過兩人一齊咱嘅消息。依家盛傳鄧建國債台高築，要整啲搞作吸金，所以話咁快又搭番上干露露，邀請佢拍新戲《公主出山3》。至於所謂玫瑰缸影結婚相，只怕都係兩人聯手嘅一場炒作囉。

蘋果日報
[轉貼] 干露露憤「露」鳥   宣佈婚訊？  /   干露露訂婚  /  鄧建國干露露將訂婚？