大財團霸權殺入電腦業，有電腦商場小舖埋怨，有平板電腦代理商不滿其售價過低，停供貨兩周以示懲罰，背後原因疑是大型連鎖電器舖向代理商施壓。
黃金電腦商場盈竣科技（圖）成為「阿信屋」翻版，「因為我賣平咗，就俾大財團針對」。董事彭煒城說，四、五個月前引入 ARCHOS一款平板電腦，「代理冇話有建議價，咁咪上網搵資料訂價」。他說後來代理不滿他售價低於建議價 200元，更停止供貨兩星期。
「佢暗示話有大舖唔鍾意。多數係連鎖電器舖啦，唔通消費者埋怨太平咩」。他說忘了當日訂價，但坦言已「有得賺」，想不到仍被投訴售價過低，「即係有啲公司賺好多」。
引入水貨抗衡
金源遊戲負責人 Michael說，「代理都係話我哋賣嘅遊戲太平」，並因而懲罰性地減少供貨。不過，他說由於可引入水貨遊戲，故仍可與代理「抗衡」。電腦業協會常務副主席呂健忠說，財團財雄勢大，可逼代理商要求小舖抬高售價，「遲早中小企冇晒，市民咪買貴嘢囉」。他促當局訂立競爭法禁止利用市場力量操控價格。代理 ARCHOS的捷成洋行否認事件，並稱當時只是貨源緊張影響供貨，才引起誤會。
《蘋果》記者
特稿
被指售價低遭停貨
http://hk.apple.nextmedia.com/template/apple/art_main.php?iss_id=20111228&sec_id=4104&subsec_id=11867&art_id=15930934
沒有留言:
張貼留言