9月20日再戰iPhone 6 iReserve搶機全攻略！

多得一個颱風「海鷗」，平時八點已經趕頭趕命嘅打工仔，今日都有機會坐定定係度抽iPhone 6。不過今年個新系統真係玩死人、既要你有Apple ID、之後要玩密碼認証、最後仲要埋你手機SMS核對身份，真係要好彩先買得到（但好過之前班炒家用程式登入咁無恥）。

不過今次落空？無緊要，20號開始大家可以朝朝都去玩抽獎，而筆者都整理好一份「基於9月16日預訂系統」嘅攻略，希望到時大家（包括我本人）到時用得著。

1.先要有個Apple ID

今年新iReserve系統，唔係用程式的話真係要考打字速度，第一關就先要你Login Apple ID，無的話就好快整定一個。為咗有機買，呢樣唔懶得。

2.熄晒所有通訊軟件、電話都要拒接、開定電腦！

跟著呢大家最好就一早起定身，七點半就要開定機準備iReserve網頁。而由於今次會用到手機SMS認証，所以任何有機會影響到你一陣send SMS嘅野都要熄晒，唔係一陣打打下次有人打電話入來你就拜拜（不過你都可以轉send返個sms過去媽叉打入來條友）。

3.Login Apple ID、準備第一次入Code認証

呢度就係惡夢開始，亦係點解筆者話最好開電腦去搶機。因為當你係iReserve成功登入Apple ID後，第二關就係要經過一個文字認証系統，即係要你係一張堆滿字嘅圖入面，搵出並輸入當中嘅4、5個由英文及數字混合認証碼。去到呢度，你就會感激自己有用電腦，因為你唔駛係手機裡面轉來轉。

不過呢部份都要講彩數，因為好彩的話，你第一張圖就睇得好清楚，否則load幾張都唔得的話，咁你當日就等於白做。

4.準備收發SMS

第三關，又係考運氣同夠唔夠快手。因為呢個時候，Apple就會要你Send一個SMS去指定號碼、裡面重要有一句指定暗號係入面（唔知會唔會每日轉換）。不過最低限度大家可以開定個SMS，到時即刻轉過去唔使load。

當你一send完SMS，照道理Apple個系統就會回覆返一個有認証碼嘅短訊畀你，然後你照著入返落iReserve度就可以揀機喇。

但係…你最大嘅敵人，就會係你用緊嘅電訊商。今日有人試過7分鐘後先收到SMS，有人甚至半個鐘後先收到。所以…睇彩數喇。

5.快，揀機！

最後呢個階段，大家只有一樣野好做，就係揀機去！

不過筆者可以俾你一個忠告，係唔好三手兩意，iPhone 6同iPhone 6 plus都預先揀到一部，一部無貨就即刻轉下部！唔係畀你入到去揀得來都無貨賣啦。

相關新聞：
蘋果iPhone香港接受預訂10分鐘售罄
傳iPhone 6申請入網許可證告吹
iPhone 6首日預訂量破400萬部
北京中關村有iPhone 6賣 售價1.3萬元人幣

自 玄米茶 | 熱新聞
[轉貼] 9月20日再戰iPhone 6 iReserve搶機全攻略！