K.OTEN：收音機唔係淘寶價

【明報專訊】「補習天王」范浩陽（K.OTEN）所屬補習社推出嘅「全攻型收音機」，聲稱接收力特強，每部賣128至228蚊，不過，佢繼前日畀文憑試考生質疑部機會干擾其他考生之後，有網民就話類似嘅收音機喺淘寶網只係值幾十蚊。

網民指淘寶售28元

有網民將「全攻型收音機」靚靚嘅貼紙搣走，見到機身有「Audiomax SR 202」字樣。一查之下，發現原來部機喺淘寶網售28蚊人民幣，連埋30蚊運費，折實都係70蚊港紙左右，即時鬧爆佢。

K.OTEN就同Emily講，呢部機喺香港買，每部要成90蚊，絕對唔係淘寶價。佢話，買咗返嚟會由同事加一條天線，等同學仔考聆聽試時收得好啲。至於點解收咁貴，佢就強調只係幫公司推銷，部機亦會免費送畀起碼補咗一年嘅「VIP」學生，新加入嘅就賣百幾蚊，只係街外人先至賣200幾蚊，賣出約10部，「佢哋唔係我學生，我點解唔可以賺佢哋錢，補貼我學生？」

[轉貼] K.OTEN：收音機唔係淘寶價