無綫新聞靚女主播張文采，上周五因為着短裙報晚間天氣而被打入冷宮，冇得喺8月餘下日子報新聞提要，相信張文采嘅粉絲會好失望。因為衣着唔夠端莊而被 cut job？據聞呢個懲罰嚇怕 CCTVB一眾女主播，為咗唔俾嚴如訓導主任嘅高層訓誡，相信稍後出鏡會由頭包到落腳。
張文采條裙有幾短？八方睇過唔覺有太大問題，只係見到當日身穿紫紅色碎花短裙嘅佢喺鏡頭前露出雙髀囉。原來 CCTVB高層發嬲係有原因，據聞當日朝早，有高層見到一位女主播着咗超短迷你裙出鏡，勃然大怒，認為佢違反咗唔可以暴露嘅守則，同日早上即時出信提點所有主播莊重，唔好着迷你裙或者熱褲。點知張文采即晚就踩地雷，難怪高層會㷫過火屎。
事旦男倡先換走保皇高層
據聞新聞部經理黃淑明其後向員工發信，話張文采條裙「史無前例」咁短，必須嚴懲佢喺8月餘下日子冇得讀星期一至五嘅晚間新聞提要；一條短裙嘅代價，就係一批可觀嘅出鏡費。
CCTVB新聞部高層向來對主播要求極高，不時批評主播嘅衣着儀容，男主播個頭 gel到太誇張或鈕鏟青、女主播額前頭髮過長兼短裙都唔容許，但最終被罰冇得報新聞就真係破天荒。平日以監察 CCTVB為己任嘅事旦男就認為，主播着短裙要被罰實在誇張，事實亦都冇乜市民投訴；覺得如果要執正個台，應該先換走保皇高層花蟹，咁先可以撥亂反正。八方記得劉慧卿當年喺無綫做記者時以吊帶裙出鏡都過關，估唔到今日嘅尺度比舊時仲低囉。
[轉貼] 短裙惹的禍 靚女主播張文采被罰停報新聞
沒有留言:
張貼留言