囝囝港鐵開大 父母收警告

【明報專訊】近年間中喺網上見到網民瘋傳有人隨處大小二便嘅照片，最近又有網民上傳小朋友喺港鐵車廂大便嘅相，同埋小朋友父母與港鐵職員理論嘅影片，話佢哋「屙屎仲大條道理」。港鐵就話職員當日有報警，最後向有關乘客發出警告信。

Emily噚日喺社交網站睇到有人「分享」呢條片，片中似乎係小朋友媽媽嘅女人話，小朋友「拉肚子」，所以要大便。當港鐵職員要求佢哋落車，喺站內廁所解決需要，否則就要報警之後，疑似小朋友爸爸嘅男子就話：「我係香港人，你唔好嚇我，我陪你玩到底！」除咗影片，個網民仲「分享」個小朋友大便嘅相。

爸爸聞報警：陪你玩到底

Emily打去港鐵問發生乜事，港鐵就話，前日傍晚東鐵線往羅湖方向列車上，有乘客用緊急通話器同車長講，有小朋友喺車上大便，車長於是通知控制中心。當車駛到大學站時，站內職員上車要求佢哋落車，對方唔肯，職員於是報警。

警方登車後，一家人先落車，職員將警告信交畀小朋友嘅父母，叫佢哋下次唔好再畀小朋友喺車上「解決」，事件亦告一段落。

[轉貼] 囝囝港鐵開大 父母收警告