港富商豪買1.2億iPhone5 設計師話富豪叫阿Joe 與大劉同名

【明報專訊】一部iPhone5，價值5600元；一部鑲滿火鑽嘅iPhone5，索價1.2億元；旁人「嘩嘩聲」同望到實嘅艷羨目光，無價。小琴成日都覺得班富豪，有咁多錢都仲繼續搵，其中一個原因，絕對係鬥身家。超跑、美女、大屋呢啲嘢都係「戰場」，但唔係成日拎得出嚟「曬命」，手邊隔離部電話就唔同喇。

早兩日，英國有個設計師Stuart Hughes就話，香港有個神秘富豪，睇中佢整出嚟嗰部億億聲嘅黑鑽版iPhone5。呢部嘢就厲害喇，個Home掣鑲咗粒值1.1億元、重26卡嘅罕見黑鑽。機身用24K金同600粒白鑽石大包圍，再配埋個藍寶石玻璃屏幕，真係閃爆全場。

Home掣鑲黑鑽 藍寶石玻璃屏幕

據個設計師所講，呢部嘢個買家係一個叫阿「Joe」嘅香港神秘富豪，親自帶埋粒黑鑽去利物浦度傾點整。市場班塘邊鵝，一聽到呢個消息，個個都喺度估，到底邊個咁豪，將只係值5000幾蚊嘅iPhone5，嚟個「資產大增值」，mark到個價貴成214萬倍呢？

有人就估城中富豪叫得阿「Joe」就唔算多，諗來諗去都係得個「大劉」、華置（0127）主席劉鑾雄，皆因佢個洋名叫「Joseph」，外國好多時都係簡稱做阿「Joe」。大劉本身又肯使錢喺啲奢侈品度，咁樣係佢都真係唔出奇。不過，到底係咪佢買咗就冇人知，但斷估下次班記者見到佢，都會實佢部手機喇。

[轉貼] 港富商豪買1.2億iPhone5 設計師話富豪叫阿Joe 與大劉同名