星夢賽果率先爆 唯唯Bye Bye！

睇完第二集《星夢》，成件事好似洩晒氣咁，鄭俊弘感情雖好但係唱英文歌，觀眾難啲投入。煲到天咁高嘅李璧琦，係好唱得我哋聽得出，不過諗返轉頭，英國「靚聲村姑」Susan Boyle當年都唔係唱流行曲參賽，一樣打動到成千上萬觀眾；唱歌呢家嘢，感情真係不亞於技巧。
至於《天與地》孖寶張景淳同羅鈞滿，老老實實，唱得幾好。「鼓佬」雖然走音不過感情搭夠，「家明」始終未夠放鬆，仲有少少模仿咗側田……之但係未至於要foul啩？學「卡拉之星」鄭世豪話齋，一切都係計數，認真你就輸了。
尋晚同時都係第三集嘅錄影，等咗成晚居然冇人流出賽果，反而係其中一個被out藝員自爆。
係，佢就係梁烈唯。
唯唯今朝喺微博咁寫︰
比賽定有輸贏！輸贏並不重要！重要的是，在過程中是否享受，和有否得著！今次參加「星夢傳奇」我學到很多！得到很多！雖然今晚出局了，但是我沒有唔開心！因為我得到的，比失去的多！我還是會繼續努力工作，在此祝福每位參賽朋友，希望他們都可實現夢想，創造傳奇！特別是我的好友鄭俊弘。
呢個賽果，係咪眾望所歸？
至於另一個被OUT者係邊個？我哋隨時同你睇實！

(後按︰多謝USER報料！查到另一個出局者係邊位，居然係讀聲樂嘅李璧琦……)

Yahoo! 娛樂圈
[轉貼] 星夢賽果率先爆 唯唯Bye Bye！