唔少剛改用iPhone5嘅「果粉」，應該感受到呢部新機食電驚人，唔少平日機不離手嘅議員同公務員，都俾呢部食電新機搞到「被失蹤」。呢部機啲電上午仲係100%叉足，但未到下午就會冇電；加上iPhone5嘅叉電線仲係好缺貨，有貪新鮮轉咗機嘅公務員，大嘆頂頭上司曾因為搵唔到佢哋已經「詐晒型」，不滿佢哋唔叉足電就出去開會。唉，潮人慣咗早買早享受，估唔到竟變成冇「電」消受。
有公務員貪新鮮換新機，點知成日外勤，唔可以返辦公室叉電，一到下午時間，部機已冇電到熄機。但由於iPhone5棄用以往嘅插頭，所以啲舊叉電線全部「失效」，俗稱尿袋嘅外置電池亦因而未能大派用場，萬一林鄭有乜事「打到嚟」，搵唔到人就大件事!
叉電線難買 總店都賣晒
用緊iPhone5嘅民主黨單仲偕就話，周三首次開立法會時，佢一邊聽議員宣誓，一邊輸入跑政治新聞記者嘅contact，點知部機一到中午就開始「失效」，佢即時call人喺金鐘買線，但點知跑勻三間都冇貨，走去中環ifc間Apple Store亦都賣晒，最後要等到夜晚返屋企先叉到電。單雞話，查實iPhone4嘅電池已開始唔掂，家用埋iCloud、行埋4G就更加唔使講。
資訊科技界嘅立法會議員莫乃光話，部機嘅電池流失速度好快，所以惟有插頭跟身，「行到邊叉到邊」，冇插蘇嘅話就用平板電腦叉，係就係煩咗啲，但總好過其他人搵唔到佢吖。
Apple iPhone5
[轉貼] 食電iPhone5 玩殘政界果粉
沒有留言:
張貼留言