拍拖總係拍到焦頭爛額，扮cool無人敢埋身，仆心仆命人哋又唔領情，究竟拖應該要點拍先啱？掌握愛情正確法則，你嘅愛情路會易行好多。
Rule #1: Love is not a game
有啲女生鍾意play hard to get，特登扮cool，唔覆call唔回email，你以為咁會令佢更緊張你，但咁亦有可能令佢以為你唔鍾意佢而打退堂鼓。試幻想：你對一個男仔有興趣，但佢唔覆你call唔覆你email、你講乜都無乜反應，你會點諗？
Rule #2: 喜歡他，就要讓他知道
如果你堅持認為女生不應該望實心儀嘅男生、不可以俾佢知道你留意佢，佢又點知你鍾意佢？如果佢覺得約你會被拒絕，佢又點敢開口？喺感情上，男生有時比女生更怕瘀，你嘅Mr. Right可能等緊你俾啲鼓勵佢！
要表示好感唔等於要飛擒大咬，你可以表現出想認識同了解佢多啲，亦可以試吓主動約佢。但如果第一次約會後佢無call返你，你都唔好再call佢，因為好明顯佢對你無乜興趣，要明白向別人表示好感唔等如對方一定有回應。
Rule #3: Not available? No way!
人人嘅擇偶條件都唔同，但最緊要的一點係──佢一定要係available ！要記住，如果佢同某女生一齊，但應承你遲啲會同佢分手，聲稱並非真係愛佢等等，並不等如佢係available 。點了解佢嘅感情狀況？可以直接問佢！如果你有懷疑，可向大家嘅common friends打聽，或者傾多幾次電話，熟絡咗先開始約會。
Rule #4: 講心唔講金
即使今時今日好多女仔都有能力養活自己，但好多人都仲會用財富、生活模式、權力、職業等等去評價男生。其實老套都要講句：愛情並非建立於金錢或物質上。維持一段關係還需要愛和包容，單係金錢並唔足夠。
Rule #5: 不要雙重標準
愛情方面，經常有好多唔平等嘅地方，例如男生出晒錢、要負責管接管送、要喺生日或情人節送貴重禮物等等。但如果大家都有工作，無理由要佢出晒所有使費，就算佢賺得多過你，偶然你請返佢會更sweet。又，如果你要求佢在任何情況下都要管接管送，就係不體諒同自私的行為。
Rule #6: 別愛上未來的他
女生要搞清楚，你係愛上宜家嘅佢，定係愛上你想像中嘅佢？例如你遇上一個幾nice嘅男生，他啱啱失戀，但你認為只要俾啲時間，佢一定會信任同愛上你。問題係，你只係愛上自己描劃嘅未來！你最終可能會浪費大量時喺錯嘅人身上。
Rule #7: 展現你的Charisma
隨住年紀增長，外表難免會走下坡，但智慧就會與日俱增。要令男生愛上你嘅智慧，你可以多同佢分享你嘅見解、夢想和感覺。記住，要做自己！忠於自己、有主見嘅女生先係最吸引。
Rule #8: 別吝嗇你的情感
人人都唔鍾意恃寵生驕、凡事「老奉」嘅女生，你應該對佢嘅好意說感謝，若佢送花俾你，你應該真誠咁道謝，並將花插喺當眼處。久唔久讚下佢，表達你對佢嘅欣賞同感謝，會鼓勵佢更有信心同熱情去投入呢段感情。
Rule #9: 男生都需要安全感
其實男生同女生一樣需要愛同安全感。唔好低估你嘅殺傷力，當你表現冷漠、笑佢某啲行為，他可能無出聲，但會一世都記住。表現出你關心佢、愛佢嘅一面，佢會更勇敢和樂意接近你。
Rule #10: 婚姻≠承諾
好多人會將「承諾」同「婚姻」混淆，當你哋拍拖半年，你開始覺得需要一啲承諾，會問自己「係咪真係想嫁俾對方；如果唔想，又係咪代表要分手？」No！你其實係需要去到另一層次嘅承諾和認同，但不一定等同婚姻，呢啲嘢要雙方面有默契、共識同計劃先得，唔可以單方面推行或撤回啊！
作者 CosmoGIRL! | Cosmo Girl
[轉貼] 女生必讀！通向幸福的10大戀愛法則
沒有留言:
張貼留言