「我愛你」呢3個字，講到口唇邊，你就唔敢再講落去，因為聽人講呢3個字應該要由男生講先，所以你欲言又止，其實，只要用腦用心去處理，做女生都可以大膽同佢講：「我！愛！你！」。
點解要講？因為你真係鍾意佢！
停一停，諗一諗！點解你會想講I love you？當遇到一個啱feel嘅人，想快啲成事係好正常，但千祈唔好魯莽，要諗清楚佢對自己係咪有相同嘅感覺，定係只係自己一廂情願嘅幻想？講一句我愛你，唔會戲劇化地令彼此關係大躍進，你要肯定自己鍾意嘅係佢嘅個性、佢對你嘅態度同埋自己對佢嘅重要性。同時，當你話你愛佢嘅時候，唔會覺得自己係個傻瓜。當你哋兩個可以分享彼此生活上嘅各種瑣碎事時，就代表你哋嘅感覺係雙向，佢好有機會會同你講返聲：「我都好愛你！」
幾時講？唔好太早講！
雖然你已經愛佢愛到不能自拔，但如果你哋只係一齊咗兩星期，呢啲絕有可能只係迷戀。喺講我愛你之前，起碼要同佢一齊咗2、3個月先，而且仲要唔係玩玩吓，而係認真投入呢段感情，互相幫助大家度過難關。患難見真情，如果大家經過風雨之後，關係比以前更加親密，咁就證明你哋嘅感情並唔係一時迷戀。如果仍然擔心佢嘅反應，可以試驗一下：當你哋喺埋一齊，例如睇緊電視時，隨口講一句：「你知嗎？同你一齊呢段時間我好開心。」或「我覺得你好好，好想一世都喺你身邊。」如果佢答你：「係咩？」並且顯得不自然，就唔好勉強。但如果佢話：「我都係！」咁佢應該喺你同佢講「我愛你」時，多數都會有同感。
點樣講？揀個特別時刻！
好！假設你已經ready好同佢講「I love you!」，甚至覺得等多1秒都會發癲，咁你就搵一個特別嘅時刻同佢講啦，例如喺你哋一齊行山，終於去到山頂，感覺好似一齊完成咗一件美妙嘅事時，放膽同佢講聲「我愛你！」。無論喺邊度，只要單對單，感到彼此好親密，而且feel到有需要表達心底話時，話語就會自然流露！向一個男生講「我愛你」的確好危險，因為佢可能無相同嘅回應，但要俾愛進入你嘅心，就必須要打開自己心扉，喺適當嘅時候take action！
作者 CosmoGIRL! | Cosmo Girl
[轉貼] 應該幾時同佢講「我愛你」？ / 情侶 / 拍拖 / 夫婦相處 / 男女朋友
沒有留言:
張貼留言