平玩Exmor RS同NFC Sony Xperia M

老實講，Xperia M同數月前的Xperia L好似（連字母編號都係隔籬鄰舍）。Xperia M的Exmor RS鏡頭以及今次Sony特別推介的NFC功能Xperia L都有；不過，Xperia M規格微量降級，價格再創新低，而且機身重有Sony最新的OmniBalance設計，機價只是$2,098，重想點先？

Sony非常強調Xperia M有NFC用，的確平價Android電話甚少配備NFC連接功能，例如三星上星期推出的Galaxy Ace 3無論價錢定規格都同Xperia M極似，但就沒有NFC了；這無疑是Xperia M在其所屬範疇內的賣點，亦方便用家使用日益普及的NFC接駁喇叭、電視機等等，平日用來機背對機背即過檔案（如原裝照片）亦夠哂有型、方便。另外，此機採用Sony的Exmor RS鏡頭，雖然得500萬像，但質素有保證，亦有HDR、影像穩定功能等等，而且重實體快門掣，這也非一般平價機種可及。

Xperia M盡可能在接受範圍內將規格下調，例如，是配備4吋屏幕，解像854 x 480；處理器是雙核MSM8227，得1GHz，配1GB RAM、4GB ROM（可以加卡），MSM8227是高通較新式的處理器，表現其實比以前的雙核處理器理想，亦能反映在跑分之中；同時，4吋加雙核這個組合亦剛剛好超越不了普遍用家的底線吧。此機不支援4G LTE，但至少3G達HSPA+，不算好慢。身為Sony新機，Xperia M採用了OmniBalance設計，不過就當然不及Z、Z Ultra等旗艦般精緻，但工整、對稱、閃石電源鍵等元素還是有繼承，而且機身不過是9.3mm厚，重有近期大熱的紫色以及罕見的黃色可揀，仍然吸引！

總評：
Sony強調Xperia M支援NFC，但其實一般消費者揀智能電話始終都係睇翻樣、牌子、幾多核、幾多吋芒同埋價錢吧。Sony Xperia M身為廉價機種（$2,098），但沒有將規格降到太低，剝削用家，再加上樣靚、多色揀，唔會咁易同人撞機，是幾可觀的抵玩之選。

Sony Xperia M定價: $2,098

[轉貼] 平玩Exmor RS同NFC Sony Xperia M